සැබෑ තරු සහ අපි දන්න තරු...!

සෑහෙන දවසකින් Post එකක් ලියන්න හිතන් බ්ලොග් එක පැත්තෙ ආවේ... කොටින්ම campus ආපහු පටන් ගත්තට පස්සෙ මමත් බ්ලොග් එක පැත්තෙ ආවෙ අතේ ඇඟිලි ගානටත් අඩුවෙන්.. ඒක නිසා මං හිතුවෙ දැන් මගේ බ්ලොග් එක පාළු අම්බලමක් වගේ ඇති කියල.. ඒත් බැලුවම ඒ අදහස වැරදියි වගේ.. මේ මාසෙටම අලුතෙන් post එකක් දාන්න බැරි උනත් පරණ ලිපි වලට comments වැටිල තිබුණ.. ඒ වගේම followes ල කීප දෙනෙකුත් එකතු වෙලා. ඒ අතර සරසවියෙ වෙනත් පීඨ වල සහෝදර සහෝදරියොත් ඉන්න එක ගොඩක් ලොකු සතුටක්.. ඇත්තටම දැන් campus එකේ වැඩ කරන වේගේ දෙගුණ තෙගුණ කරලා..Exam එකත් ළඟයි. හරියට අපි strike එකක් කරල ආව වගේ.. යන්තම් අද තමා post එකක් ලියන්න ඉස්පාසුවක් හොයාගත්තෙ.


ඊයේ ගෙදර ඇවිත් news බලන කොට මෙන්න මෙහෙම news එකක් යනවා.."නවලෝක සමූහ ව්‍යාපාරයේ සභාපති H.K.ධර්මදාස බණ්ඩාර මහතා අභවප්‍රාප්ත විය." මේ පුද්ගලයා ගැන තවත් වාර්තා වලින් කියවුනේ රුපියලක් අතේ තියාගන කොළඹ ඇවිත් දියුණුවේ හිනිපෙත්තටම නැගි ආදර්ශමත් චරිතයක් බවයි..මුලින්ම කඩ වල වේටර් වැඩ කරල තමා ඔහු කොළඹ ජීවිතය පටන් අරන් තියෙන්නේ.. නමුත් අද ඔහුට අයත් ව්‍යාපාර නිසා රටේ දහස් ගණනකට රැකියා ලැබිල ජිවත් වෙන්න.. ඒ වගේම ඔහු හොඳ සමාජ සේවකයෙක්.. තවත් මම ඔහුගේ ජිවිත කතාව කියන්න යන්නෙ නෑ.. ඒත් මට මේ කතාව ඇහුවට පස්සෙ මං ගැනම ලැජ්ජාවක් ඇති උනා..මොකද මේ නම වත් මං ඇහුවෙ අදම නිසා.. එකත් මේ මනුස්සයා මැරුණට පස්සෙ..

ඇත්තටම මේකට හේතුව මොකද්ද කියල හිතහිතා ඉන්නකොට තමා මට කල්පනා උනේ මේ මනුස්සයාගේ මොන තරම් හැකියාවක් තිබුනත් එක වැඩක් බෑ නේද කියල..ඒක නැතිව කොහොමද අද රටේ ජනප්‍රිය පුද්ගලයෙක් වෙන්නෙ..! ඒක තමා එතුමට Super star,Dream star වගේ ඒවට ඇවිත් අනුන්ගේ සින්දුවක්වත් කියා ගන්න බැරි එක.. එහමත් නැත්තං මෙගා ටෙලි නාට්‍යයක චරිතයක් කරන එක. ඉතින් මේව බැරි නිසා මේ වගේ අය රටට මොන දේ කලත් ජනතාව අතරට යන්න බෑ.. මාධ්‍ය වලින් එලියට එන්න බෑ.. ඒක නිසා ඉතින් ඒක මගෙ වැරැද්දක් නෙමේ.. එතුමාගේම වැරැද්ද..!මොකද අපි ඔය TV එකේ පෙන්නන Stars ලගේ(එහෙම කියල හිතන් ඉන්න කට්ටියගේ) අලගිය තැන් මුල ගිය තැන් විතරක් නෙමේ.. කන බොන දේවල්,යන එන තැන් කොටින්ම යටට අඳින එක ගැන පවා ඔක්කම දේවල් දන්නවනේ..! ඒ ඉතින් අපිට වටින එකම දේ අනුන්ගෙ සිංදු තමන්ගේ වගේ කියකිය නටන එකයි,හොටු පෙර පෙර බඩවැල් නාට්‍ය වල රඟපාන එකයි නිසානේ.. අපිට රට ගැන මිනිස්සු ගැන හැඟීමක් එන්නෙ එතකොට විතරනෙ..


අපේ රටේ මිනිස්සු සමහර දේවල් වලට,මිනිස්සුන්ට සලකන හැටි දැක්කම නං පුදුම හිතෙනවා.. ලංකාවෙ මහාචාර්ය එදිරිවීර සරච්චන්ද්‍ර කියන්නෙ කව්ද කියලවත් දන්නෙ නැති අපේ සමහරු ෂාරුක් ඛාන් දවසකට කී පාරක් ටොයිලට් යනවද කියලත් දන්නවා.. මැලිබන් මුදලාලි,ගොඩගේ මුදලාලි ගැන හන්කවිස්සියක් නොදන්නව උනත් අයිශ්වර්යට හම්බවෙන්න යන ළමයගේ ඔලුවෙ කෙස් ගස් ගානත් දන්නවා.. H.K. ධර්මදාස මහත්තයගෙ නමවත් අහල නැති අපේ අය TV එකේ හොටු පෙරාගෙන අඬපු පබාව පාර්ලිමේන්තු යවන්න කතිර ගැහැව්වේ ඡන්ද පෙට්ටිය උඩ නැගගෙන... අපේ මිනිස්සු, මිනිස්සුන්ගෙ ගුණාත්මක බව මනින හැටි හරි ෂෝක් නේද..!! දක්ෂයො,වැදගත් මිනිස්සු කුණු කුඩේට විසිවෙන කොට අඳ බාල හිස් මිනිස්සු අපේ ගෙදර සාලයේ රජ කරනවා.. එලොවටත් මෙලොවටත් නැති චරිත promote කරන වෙලා ධර්මදාස මුදලාලි වගේ චරිත ගැන පොඩ්ඩක් හරි මාධ්‍ය වලින් කතා කරනවානම් ඒක කොච්චර වටිනවද..! ඒ වගේ චරිත වලින් නෑ බෑ කිය කියා ඉන්න අපේ සමාජයට කොච්චර දේවල් ඉගනගන්න පුලුවන්ද..! එහෙම දේවල් මෙච්චර කල් උනානං අපේ රට මෙහෙම තියේවි ද..!


ඉතින් අපේ ගොඩක් තරුණ තරුණියන්ගේ හීනෙ වෙලා තියෙන්නෙත් මේ TV චැනල් වලින් පුම්බන තරුවක් වෙන එක..ඒ වගේ වැඩසටහන් වලට තියෙන බලු පොරේ දැක්කම ඒක හිතා ගන්න එක අමාරු නෑනේ..ඔවුන්ගෙ ලෝක වල වීරයෝ වෙන්නෙත් අර වගේ පුද්ගලයෝම තමා.. උත්සාහය,කැපවීම අවියක් කරගෙන ජිවිතේ ගොඩනගා ගත්ත, රටට මෙහෙවරක් කරපු ධර්මදාස මුදලාලි වගේ අය ඒ අයට වීරයෝ වෙන්නෙ නෑ.. ඉතින් කොහොමද මේ වගේ ශ්‍රේෂ්ඨ චරිත බිහි වෙන්නෙ.. නමුත් ඔය මොන තරු ආවත් ඒවා බොහොම තාවකාලිකයි.. නියම තරු කවුද කියන එක පරක්කු වෙලා හරි මිනිස්සුන්ට තේරේවි..!

ප්‍රශ්න

ප්‍රශ්න! ප්‍රශ්න!! ප්‍රශ්න!!!

පාරට බැස්සත් ගෙදර හිටියත් 

ජාලෙට ගියත් 

මේ දවස් වල ලොකුම ප්‍රශ්නේ

ආචාර්ය වර්ජනේ ?

ලයිට් කැපිල්ල ?

බඩු මිල ?

හෙජිං පාඩුව ? 

චැනල් 4 ?

බාල පෙට්‍රල් ?

.

.

.

.

.

නෑ නෑ බං 

ෆේස්බුක් චැට් බාර් එක වෙනස් කරලනෙ....!

අපේ එකාලටත් අමු කැවිලද මන්දා......!!!

                               

            අප්පේ........! ඇති යාන්තම් ආචාර්යවරුන්ගේ ප්‍රශ්නෙත් ඉවර උනා.දැන් ඉතින් තවත් කාලකන්ණි නොවී දෙය්යනේ කියල කැම්පස් ගිහින් වැඩ පටන් ගන්න පුලුවන්නෙ කියල හුස්මක් ගත්ත විතරයි.. ඒත් කනින් කොනින් ඇහෙන ආරංචියක් නිසා ඒ සැනසිල්ලත් නැති වෙන්න අරන්.. "පටන් ගත්ත ගමන් අපේ උනුත් ටෝකන්(ඒ කිව්වේ පන්ති වර්ජනයක්..) එකක් පටන් ගන්න යනවලු බං..අර විදෙස් ශිෂ්‍යත්ව දෙනවට විරුද්ධව.." ඔය මට යාළුවෙක් කනේ තිබ්බ කතාවක්.. මේකේ සත්‍ය අසත්‍ය බව 100% ක් ම දන්නෙ නැති උනත් මේක වෙන්නත් සෑහෙන ඉඩක් තියෙනව කියල මට හිතුනෙ මීට සති 2 කට විතර කලිනුත් අපේ උන් ඔහොම කතාවක් කිව්වා නිසා.. මේක අහපු මට නං ඌරු ජුවල්..!!! ඇයි යකෝ මාස 2 හමාරකටත් වඩා කාලකන්ණි වෙලා හිටිය මදි වෙලාද මුන්ට..? මේ කෙලව ගන්න හදන්නෙ අපිටම කියල තේරෙන්නෙ නැද්ද අපේ එකාලට..?

                  මෙහෙම strike එකක් පටන් ගන්න අපේ එකාලට මොරාල් එක එන්න ඇත්තෙ ආචාර්ය වර්ජනයෙන් යම් සාර්ථක ප්‍රතිපලයක් ඔවුන් දිනා ගත්ත නිසා වෙන්න ඇති.. ඒ වුනාට ආචාර්ය වරු  කලා වගේ අඛණ්ඩ සාර්ථක වර්ජනයක් කරන්න අපිට පුලුවන්ද කියන එකත් පොඩ්ඩක් හිතල බලන්න ඕන නේද..? විශ්ව විද්‍යාල ආචාර්යවරු කියන්නෙ රටේ පැවැත්මට යම් බලපෑමක් කරන්න පුළුවන් ශක්තියක් තියෙන පිරිසක්.. ඔවුන්ගෙ වෘත්තියට ආදේශකයක් නැහැ. ඒ විතරක් නෙමේ ඔවුන් මුදල් උපයන පිරිසක් වගේම විදේශගතව හෝ එම වෘත්තියේ යෙදීමට කිසිම බාධාවක් නැති පිරිසක්. ඒක නිසා මේ වගේ වර්ජනයක් ඕනෑම කාලයක් පවත්වාගෙන යන එක ඔවුන්ට ගැටලුවක් නෙමේ.රජයකට දැනෙන සටනක් දෙන්න ඔවුන්ට පුළුවන්.  ඒක ඒ විදියටම අපි අනුකරණය කරන්න ගියොත් කොහොම හිටීද...? අපේ කැම්පස් වල බොහෝ දෙනෙක් part time job එකකින් වත් සත පහක් උපයන අය නෙමේ.අපි තාමත් අපේ අහිංසක අම්මල තාත්තල දුක් විඳලා හම්බ කරන සොච්චම හුරං කන වීර තරුණ තරුණියෝ..! මේ දවස් ටිකේ ගෙදරට වෙලා නිකරුනේ කාලේ යවනකොටත් ඒ ගොල්ලො කොච්චර දුක් උනාද..? මොකද ඔවුන්ටත් ඕන අපිව ඉකමනට හොඳ තැනකට යවල මේ බරෙන් නිදහස් වෙන්න.දැන් කොහොම හරි කැම්පස් පටන් ගත්තම අපි strike කරල ආයේ ගෙදර අවොත් අපේ අම්මල කොසු මිටෙන් ගහල ඔය වීර පුරුෂයෝ ටික පන්න ගන්න එක නං ෂුවර්...! මොකද එක්කෝ අපි හම්බ කරල ඒ අයට සලකන්න ඕන.. නැත්තං ඒ අයගෙ මහන්සිය අපතේ නොහැර ඉගනගන්න ඕන.එහෙම නැතුව ආණ්ඩුව කියන ගොන් කතාවක් ගානේ strike කරන්න අපිට තියෙන අයිතිය මොකද්ද..?

         මේ strike කරන්න හේතු එක්ක බැලුවම ඒවා strike එකකින් විසඳන්න පුළුවන් ඒවා නෙවේ.. විදෙස් ශිෂ්‍යත්ව වලට එරෙහිව strike කරන එක හරියට, අපේ ගෙදරට අල්ලපු ගෙදර බල්ලා ඇවිත් පදිංචි උනාම අපි ළිඳේ පනින්න යනවා වගේ වැඩක්නේ.. එහෙනං ප්‍රශ්න විසඳගන්න මීට වඩා ප්‍රයෝගික ක්‍රම හොයා ගන්න ඕන නේද..?

        අපි Strike කරල ආයේ lectures ගියාම lecturer කියන්නෙ මොකද්ද.. 'We can't change our schedule... so I'm continuing from today's lecture as scheduled.'     කාල වරෙන්කො... ඇයි තිබ්බ practicals වලට හම්බ වෙන ආතල් එක කියන්න ඕන නෑනේ..! එතනත් පාඩුව අපිටමයි. අපි කලත් කව්රු කලත් strike එකෙන් පරිප්පු කන්න වෙන්න අපිටමනෙ... 

                  කොච්චර දැගලුවත් ඔය strike එකක් යන්නෙ දවස් දෙක තුනයි.. මොකද අඛණ්ඩ වර්ජන කරන්න බලයක් හෝ හැකියාවක් ශිෂ්‍යයන්ට නැති නිසා. ඔහොම කරන වර්ජනේ සමහර විට ආණ්ඩුව දන්නෙවත් නෑ. දන්නවා උනත් සත පහකට ගණන් ගන්නෙත් නෑ.(මහනායක හාමුදුරුවො කියන දෙයක්වත් තඹේකට මායිම් නොකරන ආණ්ඩුව අපේ strike එකට බය වෙයිනෙ නේද..?) රටේ මිනිස්සු දන්නෙත් නෑ. ඒ වුනාට එහෙම strike කරන එක දවසකට එක කැම්පස් එකකින් රුපියල් ලක්ෂ 20 ක විතර(මට මතක විදියට) පාඩුවක් වෙනවා..(මේ ගණන මීට වඩා වැඩි වෙන්නත් පුළුවන්..) මොකද ළමයි ආවෙ නැතිවට කැම්පස් එක සාමාන්‍ය පරිදි ක්‍රියාත්මකයිනේ(... ෂඃ ... එහෙනං වැඩේ නරක නෑනේ.අපි රජයට දවසට මෙච්චර පාඩුවක් කලානේ නේද... ඒත් අපේ උන් හිතං ඉන්නෙ මේ පාඩුව රජය පියවා ගන්නෙ මහින්ද රාජපක්ෂගේ මැදමුලන වත්තේ පොල් කඩල විකුණලා හරි, සුමන බණ්ඩාගේ හඟුරන්කෙත වත්තෙ අල උගුල්ලලා හරි ගන්න සල්ලි වලින් කියල වෙන්න ඇති නේද...? බම්බුව තමා, ඒවට ගෙවන්න වෙන්නෙත් අර උඹල අපි වෙනුවෙන් මැරෙන අහිංසක අම්මල තාත්තලටම තමා බොලව්..! ඒක අමුතුවෙන් කියන්න දෙයක් නෑනේ.. එහෙම බැලුවම අන්තිමේ අපි අපිටම කෙලවගෙන අර අසරණ දෙමව්පියො තවත් වලට ඇදල දාල.. ඒ උනාට මැති අමතිලගේ ළමයි cool එකේ පිටරටවල ඉගනගන්නවා. එහෙනං මේ පන්ති වර්ජනේ කියන්නෙ ගොන් පාර්ට් එකක් නෙමේ කියන්න පුලුවන්ද...?? ඒක නිසා මං නං කියන්නෙ මේ දවස් වල නෙමේ,කවදාවත් strike එපා කියල... මොකද මේකෙන් අපේ වත් රටේ වත් අරමුණ ඉෂ්ට වෙන්නෙ නැති නිසා..

        එකෙන් කියන්නෙ වැරැද්ද අසාධාරණේ වෙනුවෙන් නැගී හිටින්න එපා කියන එක නෙමේ..අපි strike කරමු. විරෝධය පාමු.දුෂ්ට පාලකයො දන ගස්සමු..ඒ අපිත් මේ රටේ පොරක් වුන දවසට.. මේ රටේ යමක් කරන මිනිහෙක් උන දවසට..රටට නැතිව බැරි මිනිහෙක් උන දවසට... එතකොට දැන් වගේ අපිට පරදින්න  යුද්ධ කරන්න ඕන නෑ..එදාට අපි දිනන යුද්ධයක් කරමු.

                             ඒත් ඔතනින් එලියට ගියාම කී දෙනෙක් ඔහොම කරයි ද...? කාට හරි කඩේ යනවා මිසක්..අන්තිමට රැවටිලා තියෙන්නෙ අපිමනේ... අපි විතරක් ඇයි අපේ අනාගතේ උගසට තියල යුද්ද කරන්නේ.. අපේ බාල පරපුර වෙනුවෙන්ද..??  උන් කරන්නෙත් පරණ කට්ටිය කරපු දේම තමා. තමන් මිනිහෙක් උනොත් විතරයි මේ සමාජයේ මිනිස්සු අපිට කන් දෙන්නේ.. නැතිව දෙමව්පියන්ගේ බත් පතෙන් කාල,ඒ හයිය අරන් වීරයෝ වගේ යටි ගිරියෙන් බෙරිහන් දුන්නට,පිකට් කරල පොලිසියෙන් ගුටි කෑවට, strike කලාට අපිව ගණන් ගන්න යකෙක් නෑ බොලව්...!

         දැන් සමහරු කියයි මේවා වැරදියි කියල.. එහෙමනං ඔය කරන ස්ට්‍රයික් වලින් තියෙන ප්‍රයෝජනයක් ගැන, අපිට රටට වෙන හොඳක් ගැන කියන කෙනෙක් ඉන්නවනම් කියල යන්නකෝ.. ඒවාට උත්තර දෙන්න මම ලෑස්තියි.. හැබැයි ගොන් පාර්ට් කුණුහරප ඒවාට නෙමේ..! දුර දිග නොබලා අපේ උන් කරන මේ වැඩ නිසා තමයි සුමන බණ්ඩා ලට බය නැතිව විශ්ව විද්‍යාල වල ඉන්නෙ මි හරක්, ගංජා කාරයෝ,අසහනකාරයෝ කියන්න ලයිසන් හම්බ වෙලා තියෙන්නෙ. දැන්වත් අපි මේ විකාර අත ඇරලා අලුත් මාවතක යමු. එහෙම නොවුනොත් අපිත් රටත් හැමදාම  මුග්ධ පාලකයන්ගේ සපත්තුව යට..! 

මානසික රෝගී වාට්ටුවකට ගොඩ වැදුනෙමි.

           

පසුගිය දිනක රාගම ශික්ෂණ රෝහලේ කාන්තා මානසික රෝගී වාට්ටුවට ගොඩ වදින්නට අවස්ථාවක් මටත් ලැබුන. ඒ අපි දන්න කියන කෙනෙකුත් ඒ වාට්ටුවට ඇතුල් කරලා තිබ්බ නිසා... ජීවිතේ පළවෙනි වතාවට තමා ඒ වගේ තැනකට මම ගියේ.. ටෙලිනාට්‍ය වල නං මේ වගේ තැන් දැකල තිබුනත් ඇත්තටම ඒ වගේ තැනක ගතවෙන විනාඩි කිහිපය නං කවදාවත් අමතක වෙන්නේ නෑ. මේ ඉන්නෙත් අපි වගේම දවසක හොඳට සමාජයත් එක්ක හැප්පිලා වැඩ කරපු පිරිසක් නේද කියල හිතෙන කොට නං ඇතිවෙන්නෙ පුදුම දුකක්..

වාට්ටුවට ඇතුල් වෙනකොටම ඇහුනේ "කතරගමට ගියා තමයි මැණික් ගඟත් හිඳිලා.." කියන නන්දා මාලනිගේ ගීතයක්.. මුළු වාට්ටුවටම ඇහෙන්න මේක කියමින් හිටියෙ මැදි වියේ කාන්තාවක්.. තව ටිකක් ඉස්සරහට යනකොට කඩිමුඩියේ මං දිහාවට ආපු කාන්තාවක් "අනේ මට Call එකක් අරන් දෙන්න.." යයි බෙරිහන් දුන්න.. අප්පට සිරි.. ඒ වෙලාවෙනං මට හීන් දාඩිය දැම්ම. ඇයි බෑ කිව්වොත් අතට අහුවෙන දේකින් දමල ගහන්නත් බැරි නෑ. කොහොම හරි "මං ළඟ Phone  එකක් නෑ.." කියල බොරුවක් ඇද බාල තමා එතනින් ගැලවුනේ... සමහර ලෙඩ්ඩු බලාගත්ත අත බලාගෙන... කාටවත් කරදරයක් නෑ...  තවත් සමහරු යකඩ කූඩු ඇතුලේ.. ඔවුන්ගෙ හැසිරීම් නං ගොඩක් දරුණුයි වගේ.. ඇත්තටම අපේ ජිවිත ගැන නැවත හිතල බලන්න ඒක හොඳ අවස්ථාවක්...

මොකද මෙතන ඉන්න කව්රුත් කවදාවත් හිතන්න නැතිව ඇතිනෙ තමන්ට මේ වගේ ඉරණමක් අත් වෙයි කියල.. අනිත් දේ තමා මේ කවුරුත් තමන්ට ලෙඩක් තියෙන බව දන්නෙත් නෑ. පිළිගන්නෙත් නෑ. ඒක නිසා බෙහෙත් බොන්නෙත් නෑ.බලන් ගියාම අපේ මනසට කරන්න බැරි මොනවාද නේද..? මේ වගේ මානසික රෝගීන්වත් විහිළුවට ගන්න පිරිස් අපි අතරත් ඉන්නවනේ.. ඇත්තටම මටනං හිතෙන්නේ එහෙම අයටත් තියෙන්නෙ මානසික රෝගයක්ම තමා කියල.

මානසික රෝග වල අනෙක් විශේෂ දේ තමා සමහර රෝග අපිට හඳුනාගන්න පුළුවන් උනත් සමහර රෝග එහෙම එකපාරට හඳුනා ගන්න බැරි බව. සමාජයේ වැඩිපුරම කරදර වලට ලක් වන්නේත් ඒ වගේ අය තමයි.මේ වෙලාවෙ මට මතක් උන එකක් තමයි 'Karthik Calling Karthik" කියන හින්දි film  එක. එකේ කියවෙන්නෙත් මේ වගේ බාහිරට අඳුනගන්න බැරි මානසික රෝගයක් ගැන කතාවක්.. තමන්ට තමන්ගෙන්ම එන calls නිසා මුළු ජීවිතේම වෙනස් කරගන්න මේ Karthik කියන පුද්ගලයට තියෙන්නෙ මානසික රෝගයක් බවයි අන්තිමට හෙළි වෙන්නේ.. සියදිවි නසාගන්න යන ඔහු ජීවිතේ සාර්ථක කරගන්නෙත් අන්තිමට හැමදේම නැති කරගන්නෙත් මේ  රෝගයේ ප්‍රතිපලයක් විදියටයි.. ඒකෙ කියවෙන්නේ Multi-Personality disorder කියන රෝගයක් ගැන.. ගොඩක් හොඳ film එකක්. පුලුවන්නම් හොයාගන බලන්නකෝ... අපේ මනස කොච්චර ප්‍රබල එකක් ද කියන එක ඒක බලපු මට හිතුන. මිනිහෙක් ඇති කරන්නත් නැති කරන්නත් ඒකට පුළුවන්.

අර වාට්ටුවේ මං දැකපු අනික් දේ තමා එතන රෝගීන්ගෙන් සෑහෙන පිරිසක් තරුණ වියේ පසු වන්නියන් වීම..ජීවිතේ හොඳම කාලේ.. ඔවුන් සම්පුර්ණයෙන් හොඳ වෙලා ගියත් අපේ සමාජය ඔවුන් බාරගන්න කැමති ද?

ඔය වයසෙ ඉන්න බොහෝ දෙනෙක් මේ වගේ මානසික රෝගීන් වෙන්න ප්‍රධාන හේතුව ආදර ප්‍රශ්න තමයි.. එක එක පුද්ගලයින්ගේ මානසික දරාගැනීමේ හැකියාව වෙනස්නේ..ඉතින් ඔය වගේ ප්‍රශ්නයක් ගැන ඕනවට වඩා කල්පනා කරන එකේ අන්තිම ප්‍රතිපලය තමයි ඕක.ජිවිතත් එක්ක සෙල්ලං කරන්න කලින් මේ ගැනත් හිතල බැලුවොත් හොඳයි නේද...? අපේ රටේ අධ්‍යාපන තරඟයත් මානසික රෝග වැඩි කරන්න ඉවහල් වෙන්නක්.. අපි අවට තියෙන පරිසරයත් පිස්සු හදවන,පිස්සු වැඩි කරන එකක් මිස මනසට සහනයක් දෙන එකක් නෙමේනේ...

හැබැයි ඉතින් මොනවා උනත් මොනවා කලත් කිසි ගානක් නැති අයත් අපි අතරේ ඉන්නවා.නැව ගිලුනත් බෑන් චූන් වගේ.. ඒ අය හොඳ දරාගැනීමේ ශක්තියක් ඇති අය. ඔවුන් ප්‍රශ්න දිහා බලන විදිය අනෙක් අයටත් ආදර්ශයක්.. මොනවා කරන්නත් කලින් මනස නිරෝගිව තියා ගන්න කියල අපේ ආගම ධර්මයේත් උගන්වන්නෙ එකනේ..

මෙහෙම හොඳ ද....???

මගේ ගිය පාර Post  එක හුඟක් හොඳ ප්‍රතිචාර ලැබුන එකක්(බැලුවේ නැත්තං මෙතනින් ගිහිං බලන්නකෝ)...... ප්‍රතිචාර දක්වපු හැමෝටම ගොඩක් ස්තුතියි..එත් කියන්න කණගාටුයි post එක දාල පැය 24 ක් යන්න කලින් එක්තරා website එකක්( ඒක වැඩිපුර නිව්ස් දාන වර්ගයේ එකක්) ඒක copy-paste කරල දාල තිබ්බ.... එහෙම උපුටා ගන්නවනම් අඩුම ගානේ මුල් ලිපිය තිබ්බ blog එකේ නම වත් දාන්න සදාචාරාත්මක යුතුකමක් තියෙන්න ඕන නේද.....? ඒ මුකුත් බැරි නං උපුටා ගැනීමක් කියලවත්.. මොකද ඒ ලිපිය ලියද්දි ඇති උන මොකක් හරි දෝෂයක් නිසා ඒක dashboard එකට ගියෙත් නෑ... සමහර සින්ඩි වල පෙන්නුවෙත් නෑ. feed වල අවුලක් වෙන්න ඇති.(මං වැඩිය technical වඩා කෑලි දන්නේ නෑනේ.)ඒක නිසා මං post එක delete කරල අයෙ පොස්ට් කලත් වැඩක් උනේ නෑ...උන එකම දේ තිබ්බ කමෙන්ට්ස් 2ක් delete උන ඒක විතරයි. ඒ නිසා මගේ බ්ලොග් එක follow කරන සමහර අය උනත් ඒක දකින්න නැතිව ඇති... ඉතින් එහෙම එකේ අර වගේ copy paste කරපු එකක් මුලින් දැකල පස්සෙ ඒක මගෙ බ්ලොග් එකේ තියෙනවා දැක්කම මං ගැන වැරදියට හිතන්නත් පුළුවන්නේ... මට වැඩියම දුක හිතුනෙත් ඒකයි..

මේ copy ය ගහපු කෙනා පොඩි වෙනස්කම් දෙකක් ලිපියට කරල තියෙනවා... එකක් මම දාපු picture ඒක මාරු කරල. අනිත් ඒක අර කරුණු 10 ට යටින් ලිව්ව අන්තිම ජේදේ අයින් කරල... අහ්හ්.. මාතෘකාවේ අග කෑල්ලත් හලලා... ෂෝක් නේද..? මේ තියෙන්නේ copy-paste කරපු ලිපිය 

ලිපි  කොපි කරන එක වලක්වන්න ක්‍රම ලඟකදී blog එකක තිබ්බ මතකයි... ඒත් මං ඒ දේවල් කරන්න ගියේ නැත්තේ blog අවකාශයේ ළදරුවෙක් වෙන මං වගේ එකෙක්ගෙන් මොකා හොරකං කරන්නද කියල.. අනික හොරකං කරන්න ඕන එකා ඔය මොනවා කලත් ඒක කරනවමනේ.. අනුන්ගේ නිර්මාණ දාල තමන්ගේ site එකේ hits වැඩි කරගන්න එක නං මහා පිස්සු වැඩක්.. හිතට කිසිම සතුටක් නෑනේ... ඊට වඩා තමන් ලියන ලිපියට එන එකම එක කමෙන්ට් එකත් දහස් ගුණයක් වටිනවා...!

විදෙස් සිසුන් කැම්පස් අවොත්....! ධනාත්මක විවරණයක්....!!!

              

                 දැන් කරලියට ගොඩවදින අලුත්ම මාතෘකාව විදේශීය සිසුන් අපේ සරසවි වලට ගෙන්වා මුදල් අය කර ඉගැන්වීමය. අපේ කැම්පස් එකෙත් උපාධිය විකිණීමට යන බව කියමින් පෝස්ටර් ගසා තිබෙනු දුටුවෙමි. ඒත් ආණ්ඩුව කියන්නේ මෙය ඉතාම වටිනා වැඩක් බැවින් ධනාත්මකව ඒ දෙස බලන ලෙසයි. ඒ නිසා මමත් ඒ ගැන ධනාත්මකව සිතා බලන්නට පටන් ගතිමි. පහත දැක්වෙන්නේ මගේ ධනාත්මක මොළයෙන් කල්පනා කල  ඒ ධනාත්මක සිතුවිලි වලින් කීපයකි…

1.රජය විදේශ සිසුන් බඳවා ගැනීමට වැඩි උනන්දුවක් පෙන්වන්නේ පෙරදිග රටවලින් වුවත් මගේ මතය හැටියට බටහිර දියුණු යයි කියන ඇමරිකාව,බ්‍රිතාන්‍යය වැනි රට වලින් ද ලංකාවේ කැම්පස් වලට ඒමට දැඩි උනන්දුවක් දක්වනු ඇත.ඊට හේතුව මෙහේ සමහර කැම්පස් වල කස්ටිය දෙවියන්ගෙන් ද වැඩ ගන්නට දන්නා බැවිනි. දෙවියන්ගෙන්,යකුන්ගෙන් වැඩ ගන්නා සරසවි එවැනි රටවලට ද තවමත් ස්ථාපිත කරගැනීමට නොහැකි වී ඇත.

2.ලංකාවේ සරසවියකට විභාග පාස් වූ පමණින් ඇතුලත් වන්නටද නොහැකිය.ඒ සඳහා හමුදා කඳවුරක අගල් දිගේ බඩ ගෑ යුතුය.ලණු වල එල්ලී යා යුතුය.සරඹ කල යුතුය. තාප්ප උඩින් පනින්නට පුරුදු විය යුතුය. මේ සියල්ල අවසානයේ මෙලෝ රහක් නැති නිකමකු ලෙස කඳවුරට ඇතුල් උන එකා එලියට එන්නේ සියලු නායකත්ව හැකියාවන්ගෙන් පරිපුර්ණ වූ, ඕනනම් ඇමරිකාව උනත් පාලනය කල හැකි මට්ටමේ උදාර නායකයෙක් වෙලාය..ඒ දින 21ක් වැනි කෙටි කාලයකදී වීමද විශ්ෂත්වයකි.මේ නිසා අවුරුදු ගානක් රට කරලත් යුද්ධ ඉවර කර ගන්නනට බැරි ඇමරිකාව,එංගලන්තය වැනි රට වල නායකයන්ගේ දරුවෝ ද මෙරට සරසවි වලට ඇතුළු වීමට උත්සහ කරනු ඇත.

3. අපේ කැම්පස් වල සිටින ටිකක් ඇහැට කනට පෙනෙන කෙල්ලන් දැන් සිටිනුයේ අලි ඔලුවෙන්ය. ඔවුන් සිතන්නේ ඔවුන්ට වඩා රූප සුන්දරියන් ලෝකයේ කොහෙවත් නැති බවය. එබැවින් ඔවුන් අපිට නිතරම ගැට්ට දමයි. හිතේ හැටියට කොල්ලන් කඩේ යවයි. ඒත් විදේශීය රටවල සිට පැමිණෙන සුදුම සුදු ඉටිරූප වන් වූ ද දුටුවන් වහවටෙන සරාගී අඟ පසඟ ඇති ඇමරිකන්,ප්‍රංශ,     ජපන්,කොරියන් හා චීන කෙල්ලන් දුටු සැනින් අපේ කෙල්ලන්ගේ ගැට්ට බින්දුවටම බසිනු ඇත. අපේ කොල්ලන් ද (මමත් ඇතුළුව) ඊට පසු අපේ කෙල්ලෝ සිටින පැත්තක්වත් නොබලනු ඇත. එවිට මෙහේ කෙල්ලන්ට සිදු වන්නේ හඬා වැටෙමින් අප සොයා ඒමටය.(ඇමතිතුමා අපටත් වෙනස් චොයිස් එකක් ගැන කිව්වේ මේ ගැන සිහිපත් කිරීමටය.)

4.මේ වාසිය එතනින් සිමා නොවේ. දැනට කැම්පස් එකේ ගොඩ ගිහින් සිටින උන් සිටින්නේ රටක් රාජ්ජයක් දිනා ගත් මහන්තත්වයෙනි.අපි වැනි ඔටුවන් දෙස බලා කින්ඩියට හිනා පාරක් දාන්නේ ‘උඹලට කොහෙද මෙහෙම චාන්ස්..’ කියන්නට වගේය.ඒත් නොබෝ දිනකින්ම පිටරට කෙල්ලක් ගොඩ දා ගත් පසු උන්ට වන්නේ අප දෙස බලා හූල්ලනට ය. නියම වෙලාව එනතෙක්‌ නොසිට කරගත් ගොන් කම ගැන සිය දහස් වාරයක් දුක් වීමටය.’ඉක්මන් වෙලා මා කරගත් ගොන්කමය' ආදී වශයෙන් කවි කීමටය.

5. මෙම විදෙස් සිසුන් සමග පෙම් හබ  ඇති කරගෙන ඉන් පසු විවාහ වන්නන්ට එම රටවල පුරවැසිභාවය නිරායාසයෙන් හිමි වේ.මේ රටින් කොයි මොහොතේ චුත වෙම්දෝයි හීන දකින අයට මෙය හොඳ අවස්ථාවක වනු ඇත.විදේශීය නෑ සබඳතා වර්ධනය වීමද මෙහි අතුරු ඵලයකි.

6.සාමන්‍යයෙන් බැජකුගේ,බැජියකගේ ගෙදරක මලගමක් වූ විට රොත්ත පිටින්  නිල නොවන මට්ටමේ ට්‍රිප් එකක් එම පෙදෙසට යාම සිරිතය. ලංකාවේ කොහේ උනත් ඒක ගැටලුවක් නැත. නමුත් මෙතෙක් කල් ලංකාව තුල පමණක් මෙසේ යාමට අවස්ථා ලැබුන අපට මින් පසු ලෝකයේ අනෙක් රටවල් වලටත් යාමට චාන්ස් එකක් ලැබේ.ඒ විදෙස් සිසුවෙකුගේ ගෙදරක මලගමක් වූ විට ඒ මුවාවෙන් නිතර නිතර විදෙස් චාරිකා වල ද යෙදිය හැකි බැවින්ය. මිහින් එයාර් ගුවන් සේවය මගින් ලාබදායි ලෙස මේ සඳහා ප්‍රවාහන පහසුකම් ලැබෙනු ඇත.

7.එපමණක් නොවේ.මෙච්චර කලක් ගමේ ගිහින් එන විට අපේ එවුන් ගේන ගොඩේ කෑම බීම වෙනුවට අපේ රට බැජලා ගේන සුපිරි කෑම කන්නට ද අපිට අවස්ථාව ලැබේ.තව ද ඇමතිතුමා කියන ආකාරයට අපේ උන්ට තවත් ගංජා,කසිප්පු වැනි ලෝකල් බඩු පරිහරණය කරන්නට වන්නේ ද නැත. රට බැජලා ගේන විස්කි,බ්‍රැන්ඩි වැනි ඉහල පෙලේ දේවල් පරිහරණය කරන්නට ද එවිට අවස්ථාව ලැබෙන බැවිනි.

8. දියුණු විදේශ රටවල සිසුන්ට මෙරට සරසවි වලට ඇතුල් වීමෙන් සුවිශේෂී සෞඛ්‍ය ප්‍රතිලාභයක් ද අත් වනු ඇත. මෙම සිසුන් බොහෝ දෙනෙක්(තරුණ වියේ දීම) තරබාරු කම මගින් පීඩා විඳී.නමුත් ශ්‍රී ලංකාවේ සරසවි වල මාසයක් අහාර ගන්නා ඔවුන්ට තම බර කිලෝ 10 කින් පමණ අඩු කර ගත හැක.එමගින් අනාගතයේ ඔවුන්ට ඇති විය හැකි අධිරුධිර පීඩනය,පිළිකා,කොලෙස්ටරෝල්,දියවැඩියාව වැනි රෝග වලින් වැළකිය හැක.නමුත්  සරසවියෙන් පිටව යන කාලය වන විට මන්දපෝෂණය වැළඳීමේ සුළු ඉඩක් ද ඇත.

9.අනෙක් සිසුන්ට වගේම මෙම විදෙස් සිසුන්ට ද SB ඇමති විසින් ලැප්ටොප් එකක් ද ලබා දෙනු ඇත. එම රටවල සිසුන්ට එවන් පිනක් නැති බැවින් ඔවුන් කෙසේ හෝ ලංකාවේ කැම්පස් එකකටම රින්ගීමට උත්සහ දරනු ඇත. අවසානයේ ඩිග්‍රිය නැතත් ලැප් එකක්වත් ඔවුන්ට ඉතුරු වනු ඇත.

10.තම රටේ වසර 4 කින් ලබා දෙන උපාධිය ඔවුන්ට මෙහි පැමිණ වසර 7,8 කින්(සමහර විට ඊටත් වැඩියෙන්) පමණ ලබා ගත හැක.නමුත් ගෙවන්නට සිදු වන්නේ වර්ෂ 4 කට ගාස්තු පමණි. වඩා වැඩි කාලයක් සොඳුරු සරසවි ජිවිතයේ මිහිර විඳීමට ඔවුන්ට එමගින් ඉඩ ප්‍රස්ථාව අපේ පාලකයන් හිමි කර දෙනු ඇත.. තමා උපාධිය ලබා ගන්නා ආකාරය තම දෙමාපියන්ට පමණක් නොවැ දරු මුණුපුරන්ට ද පෙන්වන්නට ඔවුන්ට හැකි වීම කෙතරම් භාග්‍යයක් ද..!!

           මේ අනුව බලන කල මෙම තීරණය පාලකයන් ගෙන ඇත්තේ ඉතා දුරධර්ශිව සිතා බලා බව ඔබට පැහැදිලි වනු ඇත. විදෙස් සිසුන් 1000 ක් බඳවා ගැනීමට මෙරට සිසුන් 1000 කට සරසවි වරම් අහිමි කිරීමට සිදු වුවද මගේ කල්පනාවේ හැටියට අපේ එවුන් 10,000 ක් හෝ ඉවත් කර විදෙස් සිසුන් බඳවා ගැනීම ඉතා කාලෝචිත ක්‍රියාවකි.ඔබටත් මේ ආකාරයේ ධනාත්මක සිතුවිලි නැතිනම් ඊට හේතුව ඔබ රජයේ නාලිකා වල පුවත් නොඇසීම බව කීමට සිදු වේ. මේ ආකාරයේ ධනාත්මක සිතුවිලි  මෙම මාතෘකාවට අදාලව ඔබටත් ඇත්නම් ඒවාත් පහත සඳහන් කර යන මෙන් කාරුණිකව ඉල්ලා සිටිමි.